15.08.2013 - (13077) Hans-Henning-Holm-Preis 2013 für Heinke Hannig

Dateianhänge:

H-H-Holm-Preis_2013.pdf (89.7 kB)

 

 

 

De Sparkassenstiften vun Neddersassen gifft den „Hans-Henning-Holm-Pries“

för Nedderdüütsch Hörspeel an Heinke Hannig

 

„Schattenkind“ heet dat Hörspeel, wo de Autorin Heinke Hannig ut Drelsdörp/ Noordfreesland den „Hans-Henning-Holm-Pries 2013“ vun de Sparkassenstiften Neddersassen för wunnen hett. För den Pries gifft dat 1500 Euro. Bi den 66. Bevensen-Dagfohrt schall he an’n 15. September 2013 an de Autorin öbergeben warrn. De Loffreed un Priespredigt op Heinke Hannig un ehr Hörspeel ward Georg Bühren vun’n WDR ut Münster holen. He is ok de Vörsitter vun dat Prieskuratorium. Dat is al de 9. HHH-Pries, de bi de Dagfohrt vergeben ward.

De Jury seggt darto: „Een ‚Hiob-Geschicht’ vertellt Heinke Hannig in ehr Hörspeel ‚Schattenkind’: Dor is de Öllern ehr eerst Dochter – se hett Mechhild heten – mit Bloodkreev doodbleben. De tweet Dochter fallt jüst an ehren 8. Geburtsdag ut’t Finster, is to Schoden komen un liggt in’t Krankenhuus. Disse Dochter, de ok Mechthild heten deit, steiht in’n Schadden vun ehr dode Süster. Üm ehr to sünd Mudder un Vadder, een Bibliothekarin un de Lehrerin. Ok de Fründ, Felix, un een Dokter speelt mit. Dat Hörspeel vertellt keen Geschicht, de liekut löppt. Dat Bild vun de Öllern, de traumatiseert sünd, un de ‚tweet’ Mechthild ward ut Facetten tohoopsett, de klook boot un in een genaue Sprook bunnen sünd. All de Personen bringt mit mannigmol bannig korte Facetten de Geschicht wieder, as wenn een een Mosaik ut veel luerlütte Steen boon deit. Op’t Letzt kannst du dat ‚Schattenkind’ plastisch sehn. Jüst wegen de Spraak so knapp un genau bunnen is, kummt op disse Aart Poesie un Präzision tostannen. ‚Dat is Dichtung!’ hett de Jury meent un hett de Autorin för dit Hörspeel-Manuskript uttekent.“

Heinke Hannig boorn Sörensen stammt ut Noordfreesland un is al vele Johren as Autorin bekannt. 1957 in Högel/Noordfreesland to Welt kamen, hett se 1976 an de Theodor-Storm-School in Büsum ehr Abitur mookt un füng mit Studeren in Kiel an. 1980 weer se dor al mit trech un möök ehr Examen. As Realschoollehrerin geev se in Husum, op Helgoland un in Bredstedt/Noordfreesland Ünnerricht. Man 1994 geev se ehr Profession an de School op, weer ok keen Beamte mehr un leevt vundaag mit ehr Lüüd as free Autorin in Drelsdorf/Noordfreesland in de Eck vun de Welt, de ehr Plattdüütschland is. Se schrifft Geschichten un Artikel, för Zeitungen un för’n Funk. Se hett 2004 den eersten Pries bi ‚Vertell doch mal’ vun’n NDR wunnen, kreeg 2005 ok den „Freudenthal-Pries“ un ’n paar Jahr later den Freudenthal-Förderpries. In’n Mohland-Verlag hett se Böker rutbröcht, to’n Bispeel de Titel ‚Geschichten vun dat Glück’ un ‚Wullmüüs in de Buuknabel’.

Vun 2005 op an hett de Sparkassenstiften vun Neddersassen dat in ehr Hand un gifft dat Priesgeld. De Naam för den Pries stammt vun den Autor un Rundfunkredakteur Hans Henning Holm, de sik üm de nedderdüütsche Spraak un Literatur verdeent mookt hett un in verleden Tieden dat Leit vun de Nedderdüütsche Afdelung bi’n NDR in Hamborg harr. He hett sik sünnerlich för Nedderdüütsche Hörspelen insett.

(Niedersächsische Sparkassenstiftung - www.nsks.de - hochdt. siehe Anlage)

"Schattenkind" vun Heinke Hannig is vun Radio Bremen un NDR för den Funk ümsett un produzeert worrn. De Regie harr Hans Helge Ott. Dat ward send bi de enkelten Regionalprogramme in'n September un Oktober. De Termine un Infos find sik ünner: http://www.ndr.de/kultur/norddeutsche_sprache/plattdeutsch/hoerspiel/schattenkind101.html un http://www.radiobremen.de/nordwestradio/sendungen/niederdeutsches_hoerspiel/kalender130_date-20131004.html

 

Besöök ok http://www.facebook.com/PLATTNET.de un wies uns, dat di PLATTNET.de behagen deit!