01.11.2013 - (13108) Niedersächsisches Verdienstkreuz für Carl-Heinz Dirks

 

 

 

Verdeenstkrüüz an ’n Band för Carl-Heinz Dirks

 

In d’ Rummel vun dat Emder Raadhuus hett de Boverste Börgmester vun Emden, de Heer Bornemann, in Updrag vun de Ministerpräsident vun Neddersassen, Stefan Weil, dat Neddersassische Verdeenstkrüüz an Carl-Heinz Dirks anbrocht.

Dirks hett de Orden kregen för 40 Jahr Wark up dat Rebett Plattdüütsch. He is Baas vun de Schrieverkring Weser-Eems, Vörsitter vun de Bevensen-Dagfahrt, sitt in verscheden Jurys, befaat sük al lang mit de plattdüütsche Schrievwies, is Autor, un besünners an ’t Hart liggt em, dat de Lüüd plattdüütsch leest. So hett he al in de 80er Jahren in Hambörg dat Blatt vun de Oostfresenvereen maakt, un nu al siet 21 Jahren – tosamen mit Hans-Hermann Briese – de Tiedschrift DIESEL, ganz un gaar op Platt un ganz un gaar op egen Risiko. „Alleen kann  een nich vööl maken“, seggt he, „du bruukst alltied Kollegen un Frünnen, dat geiht blot mitnanner! Un  so frei ik mi over de Orden, man noch vööl mehr tellt de Frünskupp, de ik so faak beleevt hebb up dat Rebett van Plattdüütsch.“

 

 

Besöök ok http://www.facebook.com/PLATTNET.de un wies uns, dat di PLATTNET.de behagen deit!