11.11.2013 - (13117) Keerlke-Pries för Hanne Klöver

 

 

Keerlke-Pries för Hanne Klöver

NDR-Fru ward mit oostfreeschen Plattdüütsch-Pries överrascht

 

De lütte Statue hebbt se maakt na de Romanfigur vun Wilhelmine Siefkes - den „Keerlke“. Nu al siet 20 Johren gifft dat den lütten Keerl ut Ton as Utteken för Minschen, de sik besünners för de plattdüütsche Spraak engageern doot. Utgeven deiht düssen Keerlke-Pries de Vereen „Oostfreeske Taal“, he is een vun de wichtigsten Plattdüütsch-Priesen in Oostfreesland. Nu hett em bi de Fierstünn in Burlage bi Rhauderfehn (Landkreis Leer) Hanne Klöver kregen. Se is Mitarbeitersch bi Radio un Fernsehen vun’n NDR Neddersassen. Lüüd kennt tominnst ehr Stimm, wenn’t af un an Plattdüütsch in’t Programm vun „Hallo Neddersassen“ geben deit. „Ik fööl mi eenfach wunnerbaar, dat is so mooi, dat ik dissen Pries kregen hebb“, sä de NDR-Fru un frei sik bannig. Se harr vörher nix ahnt un hett dat eerst in de Fierstünn to weten kregen.

De Jury hett löövt, dat Hanne Klöver de Region, woneem se togangen is, en Stimm geben deit. Se sett sik in för dat Plattdüütsche un för dat Saterfreesche. Mit en sünnerlich fein Benefiz-Kalenner sammelt se babento Geld, dat mit Projekten de lütten Spraken holpen warrn kann.

Hanne Klöver is in de Cloppenborger Kant to Huus un maakt ehr Arbeid för den NDR al üm un bi siet 20 Johren. In’t Radio un Fernsehen is Plattdüütsch ehr besünner Rebeet. Man de taffe Fru hett ok al en poor Böker maakt, de de Kultur vun de Region beschrieben doot: „Spurensuche im Saterland“ un „Ostfriesland kocht: Van Pottjekiekers un Pottjeslikkers“. Nu is ehr Engagement mit den wichtigsten Plattdüütschpries vun Oostfreesland würdigt worrn. Hartli Graleern!

(nach NDR Presseinfo - www.ndr.de)

Foto: www.ndr.de - Frank Jakobs

 

Besöök ok http://www.facebook.com/PLATTNET.de un wies uns, dat di PLATTNET.de behagen deit!