12.11.2013 - (13121) Böker-Tipp: "Dat blaue Band" von Matthias Stührwoldt

 

 

PLATTNET - Böker-Tipp

 

Matthias Stührwoldt:

Dat blaue Band

 

(pn) De Buern kennt dat blaue Band: Dat is ut Plastik un ward in de Strohpresse bruukt, de Strohballens (Strohklappen) tosamen to binden. Un wenn de Ballens denn later utstreut sünd, denn sammelt sik die blauen Bänder an. Kannst allens mit tohopen binden: den Tuun, en klapprige Döör, den olen Ford-Transit un jichtens noch wat. Matthias Stührwoldt vertellt uns dat in sien niegstet Book, dat wedder frisch un munter vun den Alldag vertellt, mit den de Buer un Familienvadder to doon hett. En beten Erinnern un Nostalgie, en beten Philosophie, en beten Pädagogik, en beten Buernlatien. Mehr as dörtig lütte Vertellen, de Matthias Stührwoldt mit sien Laptop op den Kökendisch schreben hett, as he seggt. Vertellen, de he al meist all in’t Radio bi „Hör mal’n beten to“ opseggt hett. Vertellen, mit de he alle poor Daag in’t Land ünnerwegens is un ehr vördregen deit bi de Landfruuns, de Heimatvereene un de Plattdüütschkrinks. Un he hett middewiel bannig vele „Fans“.

 

Matthias Stührwoldt

Dat blaue Band

Quickborn Verlag, Hamburg 2013

ISBN 978-387651-382-9

10,80 Euro

 

www.quickborn-verlag.de

 

Besöök ok http://www.facebook.com/PLATTNET.de un wies uns, dat di PLATTNET.de behagen deit!