PLATTNET-Nachricht  -  21.12.2013

PLATTNET: Böker-Tipp

Dora Heldt: Wiehnachten as jümmers ...

Böker vun Dora Heldt leest de Düütschen allto geern. En Barg dorvun sünd al as Filme in’t Fernsehen sendt worrn. Ok de dree Geschichten in dütt Book hett de Schrieversfru, de in Sylt to Welt kamen is un nu in Hamborg leben deit, op Hochdüütsch schreben. Heike Thode-Scheel un Peer-Marten Scheller hebbt ehr in’t Plattdüütsche öberdregen. Un dat hett allerbest klappt. Dat sünd Wiehnachtsgeschichten vun hüüt: In de Geschicht „Swesterndag“ sünd Karola un Katrin, de op den letzten Drücker den Hilligen Avend för de Öllern utrichten mööt – dorbi is en niegen Fründ för Karola in Sicht. Wat dat woll ward? – Mutt een jedeen Johr jümmers mit de hele Familie de Wiehnachtsdaag tobringen? Dat fraagt sik Ines in de Geschicht „Wiehnachten as jümmers“. All fohrt se as jümmers na Sylt – bloots an’t Enn markt all, dat jedeen den annern wat vörmaakt hett. All stellt se sik Wiehnachten anners vör as in Familie – ok de Öllern .... „En Wiehnachtsjob“ heet de drütte Geschicht, wo dat üm en verloren Hund geiht. An’t Enn gifft dat en schöne Wiehnachtsfier mit allerbest Eten.

Dat sünd humorige Geschichten to’n Smustern, de een geern lesen mag.

Dora Heldt:

Wiehnachten as jümmers ...

Plattdüütsch vun Heike Thode-Scheel un Peer-Marten Scheller

Quickborn (Hamburg) 2013. 95 Seiten

ISBN 978-3-87651-381-2

10,80 Euro