14.06.2014 - (14046) Quickborn-Preis 2014 für Georg Bühren

 

 

 

Georg Bühren ut Münster hett den Quickborn-Pries 2014 kregen

De Pries kümmt vun de Sporkassenstiften Neddersassen

 

Georg Bühren ut Münster/Westfalen kreeg an’n Sünnobend, an’n 14. Juni 2014, den Quickborn-Pries 2014 vun den Sporkassenstiften Neddersassen in’t Freelichtmuseum an’n Kiekebarg in de Horborger Bargen in de Hand. Michael Heinrich Schormann, tweete Geschäftsföhrer vun de Sporkassenstiften Neddersassen, hett den Pries, för den dat 2.000 Euro geben deit, in een Fierstünn an den Priesdräger öbergeben. De Vörsitter vun’t Nedderdüütsche Institut in Bremen, Dirk Römmer, hett de Loffreed op den Priesdräger holen.

Georg Bühren is bi den WDR anstellt un hett sik as hoochdüütsche un nedderdüütsche Autor eenen Nomen mookt. He wöör al 1996 mit den Rottendorff-Pries un 2002 mit den Fritz-Reuter-Pries vun de Stiftung FVS uttekent. Bühren hett de Jury besünners mit sien Lyrik öbertügen kunnt, de sik in den Band

„Unnerweggens“ finnen loot. Hier sünd nee nedderdüütsche Gedichten tohoopstellt. No de eersten beiden Lyrikböker „De Lüe, de Wäör, de Tied“ un „düssiets, affsiets, gientsiets“, un no dat Theoterstück „Uewergang“ un den hoochdüütschen Roman „Das Zirkular“ is de Band „Unnerweggens“ letzt Johr in’n Sülvstverlag vun de Vereenigung Quickborn in Hamborg als Johrsgoov rutkomen.

De Quickborn-Pries vun de Sporkassenstiften Neddersassen ward alle twee Johr vergeben, dit Johr to’n föfften Mol. Mit den Pries ward besünners gode Arbeiden op dat Rebeed vun de nedderdüütsche Sprook, Literatur un ok Forschung in de Volkskunde uttekent. Gründt wöör de Pries al 1960 vun’n „Quickborn, Vereenigung för nedderdüütsche Sprook un Literatur e.V.“ in Hamborg.

(Niedersächsische Sparkassenstiftung / Vereinigung Quickborn)

Foto: Georg Bühren (in de Mitt) mit Vertreters vun de bedeligten Institutschonen un Deelnehmers vun de Prieskommischoon.

 

Besöök ok http://www.facebook.com/PLATTNET.de un wies uns, dat di PLATTNET.de behagen deit!