PLATTNET-Nachricht  -  08.09.2014

Nieger Vörsitter un Sitz bi’n BNA

(Bund Niederdeutscher Autoren)

Dei „Bund Niederdeutscher Autoren“ e.V. (BNA) för Mäkelborg-Vörpommern un dei Uckermark“ is an’n 22. Februor 1990 von Gerhard Diekelmann, Verchen, gründ worden. Diekelmann stünn denn’ Verein ok teigen Johr vör. As Wolfgang Mahnke in’t Johr 2000 Vörsitter würd, wesselte dei Vereinsitz von Verchen nah Rostock. Nu liggt wedder ein Wessel an: Dr. Jürgen Rogge is in’n Mai 2014 tau’n Vereinsvörsitter wählt worden un dei Sitz von’n BNA heit nu:

                     Bund Niederdeutscher Autoren e.V.

                     Vörsitter Dr. Jürgen Rogge,

                     Dorfstraße 5,

                     19384 Perleberg-Lübzow

Wat hebben dei BNA-Plattschriewer sick von Anfang an vörnahmen? Sei will’n dei plattdütsche Literatur dörch eigen Bäuker rieker maken un dei nedderdütsche Sprak plägen. Dorbi hett dei BNA dörch dei Rutgaw von sien Anthologie „Plattdütsch Blaumen“ wat Besonners henkrägen. Von 1991 an bet hüt sünd Bauk I bet XI „Plattdütsch Blaumen“ up’n Markt kamen, dat heit alle twei Johr hett dei Verein einen niegen Band präsentiert. Dat is in’e Vereinsgeschicht von Mäkelborg-Vörpommern einmalig!

Dei Mitgliedertahl is von sien Grünnung an ümmer anstägen, hett denn ’n poor Johr stagniert un geiht nu siet 2008 trügg. Kein Wunner, denn dei mihrsten Mitglieder sünd öller as 65 Johr. Dat heit, dei BNA künn jungsche Schriewerslüd gaut bruken.  Dei BNA hett stännig Kuntakt tau all dei groten Plattvereine as bispillswies: tau dei Fritz Reuter Gesellschaft, Niebramborg, John Brinckman Gesellschaft, Jürgensdörp orer Johannes Gillhoff Gesellschaft, Glaisin.

BNA-Autoren sünd Stammschriewer för all dei Tiedingen, dei in uns Land rutkamen, oewer ok för denn’ „Voß un Haas“-Klenner (Hinstorff Verlag Rostock), „kikut“ (Fritz Reuter Literaturmuseum, Stemhagen) orer „Quickborn“ (Hamborg). Intwüschen hebben dei BNA-Autoren 65 eigen Bäuker schräwen un dormit för dat Bestahn von dei nedderdütsche Literatur in uns’ Bunnesland orrig ’n Deil bidragen. Ut dei Bäuker ward ok landup landaf väl vörläst, so an 150 Mal in’t Kalennerjohr. Dei Verein un enzelne Mitglieder würden för ehr Daun bi dei Heimatpläg orer anner Kulturarbeit utteikend. Twei Mitglieder krägen vör besonners gaut schräwen Bäuker denn’ Fritz-Reuter-Literaturpries: Wolfgang Mahnke (2003) un Heinz Pantzier † (2008). Denn’ Johannes-Gillhoff-Literatur-pries kregen Karl-Heinz Madaus (2008) un Jürgen Pump (2014). Dei BNA sülben kreg vör dei Rutgaw von „Plattdütsch Blaumen“, Bauk X, (2011) denn’ Fritz-Reuter-Literaturpries, wat ein hoge Anerkennung un Utteiknung för sien Arbeit is, oewer ok för dei besonners gaude Qualität von dei schräwen Rimels un Vertellers in dissen Band.

(W. Mahnke, Ehrenvörsitter BNA)