Hayo
Schütte:
Pérdita
Studeern un Leevde na den letzten
Weltkrieg
(zweisprachig Hoch- und
Plattdeutsch)
„Edo lengt. Na en Kommilitonin,
teihn Johr jünger as he. Se hett al en annern toseggt, datt se em freen will.
Man Edo lett sik nich daalstuken un nich de Botter vun't Brot nehmen, nee. Mit
sien ansläägschen Kopp un Talent to'n Geldverdenen as Översetter un
Swartmarkt-Import-Export-Händler un mit sien stevige Gestalt hett he allens, wat
dor tohört, en Froo för sik intonehmen. En Froo ut beste Familje, Dochter vun en
poolschen Exil-Minister, mit allerbeste Maneren – aver mit en bannigen Drall na
den buddhistischen Gloven. Edo maracht sik af. Schrifft Gedichten. Bütt ehr
Reisen, Towennung un allens, wo en junge Froo na langen deit. Man se mag sik
nich fastleggen, schoonst se dat föhlen deit, datt Edo en Baas vun Kirl is. Man
op de anner Siet steiht bi ehr de Twievel ... Wat Edo sien Behinnerung, sien ole
Polio, de he mit negen Johr dörmaken müss, dor mit en Grund för is, datt se sik
em nich hengeven will? Seggen deit se dat nich.
Klor, datt Pérdita Bescheed weet,
wat Edo vun ehr will. Man se mag ok nich nee seggen, hett dat to un to girn, mit
em to snacken över Literatur, över Religion (de Edo egentlich gor nich
intresseert, aver Schiet wat, wenn de Deern dor över snacken will
...)
Toll för Toll arbeidt sik Edo an ehr
ran, över den Kopp, den he ehr verdreihen un verküseln mutt. He weet ehren
Gesmack to drepen, he sett allens in Bewegung, lehrt ehr Familje kinnen un maakt
ehr mit sien Verwandte bekannt, mit soveel Charme - un Kalkül. Un he maakt de
Höll dör, jeden Dag, dat Ziel jümmerto vör Ogen. Un kiek, toletzt ännert sik wat
in Pérdita. Se snackt nich mehr vun den Kirl, wo se egentlich mit tohopen is. Op
en bannig smalen Padd geiht Edo wieder un kriggt, wat to smecken, aver nich
fasttoholen is ...
En Novelle, de anrögen deit un mehr
över Mannslüüd, Froonslüüd un wat dortwüschen liggt, seggt as de ganze
plattdüütsche Literatur betherto.“
(Heiko Frese, www.plattschapp.de)
Hayo Schütte:
Pérdita
Studeern un Leevde na den letzten
Weltkrieg
Cacherien: Sülbstverlag Hayo Schütte
2014
ISBN
978-3-00-045928-3
180 S. + CD
18,00 Euro