PLATTNET-Nachricht  -  26.09.2014

PLATTNET-Bökertipp:

Bolko Bullerdiek:

Fundsoken. Geschichten von güstern un vondoog

In’n Januar al is Bolko Bullerdiek 75 Johr oolt worrn. Mennig een Book hett he ruutbröcht in de verleden Johren. Böker mit Geschichten to’n Gruveln un to’n Smustern, Böker mit Vertellen un Böker mit Gedichten, Böker för Kinner un för junge Lüüd.

Ok en Barg Priesen sünd dorbi ruutsuert, wieldat de Prieskommitees markt hebbt: Hier is en Könner an’t Wark, een, de de Literatur versteiht, de sien Handwark versteiht.

Nu hebbt he un de Quickborn-Verlag düsse Anthologie ruutbröcht: „Fundsoken“.

In acht Kapitels sünd mehr as 50 Texten tohopen kamen, de mehrsten in Prosa, en beten Lyrik. Dat Mehrste is nich nieg, wat in dütt Book binnen steiht. Hett al in Böker stahn, de de Autor bito rutbröcht hett: „Tohuus un annerwegens“, „Blangenbi – und doch weit weg“, „Distelblöden“ un „Buten is dat koolt“. Man de mehrsten sünd intwüschen vergrepen.

Hier kannst de Geschichten wedderfinnen - Fundsoken eben. De besten Texten? Wölk vun de besten. Hier kannst sehen, woans een sien Handwark versteiht un  Spannung gestalten kann: Twüschen Güstern un Hüüt, twüschen Groot un Kleen, twüschen Tohuus un Annerwegens, twüschen Vergnögen un Besinnen. „Docere et delectare“ - Belehren und Erfreuen, dat is de ole Schrieverkunst, de al in de Antike praktizeert worrn is. Bolko Bullerdiek versteiht sik dorop. To’n Bispill in siene Fabelgeschichten, dor kannst dat sehen. Un in de Märkentexten. Dat sünd keen Parodien, dat sünd kloke Variationen, de op de hütige Welt anspelen doot.

Mennig en Geschicht lett vermoden, dat se bannig autobiografisch is, dat se vertellt vun den Autor sien Familie, sien Kinnertiet, siene Beleevnisse in Afrika, sien Schoolmestertiet, sien Rottenphobie. Also fraagt wi: „Is dat ok wohr?“ Un he antert: „Wohr is dat wiss“, (...) man wat dat akroot so ween is, dor kann ik mien Hand jüst nich för in’t Füer leggen. (...) Wohre Geschichten sünd nich de, de so passeert sünd, man de, in de en Wohrheit oplücht.“ Süh!

Also dat Fazit: En wunnerbor Book, Bolko Bullerdiek sien Schrieverkunst kennen to lehrn. Keen Retrospektive op sien Schrieverleven, denn wi wöllt noch vele gode Texten vun em in de Hannen kriegen.

Bolko Bullerdiek:

Fundsoken.

Geschichten von güstern un vondoog.

Quickborn-Verlag, Hamburg 2014

ISBN 978-3-87651-385-0

10.80 Euro

(Volker Holm, PLATTNET)