Hoch schall he leven!

Hayo Schütte ward 85.

(pn) He is een vun de Vergnögten, he is een vun de Nadenkern, he is een vun de Achtersinnigen. He is een, den all gern hebbt.

Hayo Schütte ut Langendörp an de Elv ward hüüt 85 Johr old. He hett uns mennig en feine Vertellen schenkt, he hett vun sien Dörp vertellt, vun de Lüüd üm em rüm, vun de Enkelkinner. Veer Böker sünd in’n Hannel, dat föffte is in Arbeid. Jedeen Johr kaamt Frünnen to sien Sommerfest op sienen Hoff in’t Wendland, de lange Tiet afsiets leeg in’t „Zonenrandgebiet“ un de nu merren in Plattdüütschland to finnen is.

Hayo hett dat nich licht. Mit sien „Rolli“ is he jümmers op Hölp anwiest, wenn he jichtenswo hen will. Na Bämsen in’n Harvst to de Dichter-Dagfohrt. Na Mölln in’t Fröhjohr to dat Autorendrepen. Man de Lüüd üm em rüm sünd jümmers för em dor. En wunnerbar Familie: Söhn Garlef fohrt em, Garlef driggt em de Treppen op un dal. Dochter Rika kümmert sik üm sien Internetsiet http://hayointnett.blogspot.de. För ehr un för ehre Musikgrupp „Swing op de Deel“ schrifft he de passlichsten plattdüütschen Texten.

„Wat schenkt een to’n Geburtsdag?“ fraagt Hayo. To sienen Geburtsdag schenkt he siene Frünnen Texte un Noten as freen Download. Musikerin Rika seggt dorto: „Wir werden Noten zum freien Download einrichten, teils von seinen eigenen plattdeutschen Kinderliedern, teils von freien Liedern, die er ins Plattdeutsche übertragen hat (z.B. den Gospel 'De leeve Gott höllt di in sien Hand' und andere), auch ein paar seiner Gedichte haben wir mit Swing op de Deel vertont, das kommt dann nach und nach und darf benutzt werden, gern auch im Kindergarten.“

Wi graleert vun Harten un wünscht för de Tokunft allens Gode.

Besöök ok http://www.facebook.com/PLATTNET.de un wies uns, dat di PLATTNET.de behagen deit!