PLATTNET-Nachricht  -  25.11.2015

Böker-Tipp:

Andrus Kivirähk: De Schiet un dat Fröhjohr

Faken vertellt Kinnerböker vun söte Boren, vun fidele Hasen oder vun kregele Müüs. So’n Deerten sünd in düt Kinnerbook nich in to finnen. Düt Book sien Helden sünd en romantischen Schiet, en Spökel, wat in’n Pisspott wahnt, en Söcken, de Eier leggt, de Seeröver-Lepel un anner wunnerliche Kumpanen, de betto keen Utsichten harn, in en Kinnerbook optoduken. Man nu sünd se dor: Allerhand Gestalten, de wi ut usen Alldag kennt un wo wi kuum op ahnen doot. De wert in düt Book lebennig un drievt düchtig Spijöök mit de Minschen üm jem to.

De estnische Autor Andrus Kivirähk is in dat lütte Land an de Oostsee för sien Kinnerböker jüst so bekannt as för sien Fiktschoon för de Groten. Nich blots mit düt Book hett he dat in sien Heimat bet ganz baven op de Bestsellerlist schafft.

De Illustratschonen sünd vun Heiki Ernits, den sien Figuren de een oder anner villicht kinnt ut de Filme över Lotte ut dat Erfinnerdörp.

Översett wurn sünd de Geschichten vun Heiko Frese, Schoolmester in Lümborg un Berader för Plattdüütsch an de Scholen in Neddersassen.

Andrus Kivirähk:

De Schiet un dat Fröhjohr

plattdüütsch vun Heiko Frese

Lümborg: Plaggenhauer Verlag 2015

ISBN 978-3-937949-19-2

76 S. Fast inbunnen. 17,3 x 24,6 cm

Kösten deit dat Book 14,95 EUR.

To bestellen ünner www.plaggenhauer.de un in jeden Bookladen.

(www.plaggenhauer.de)