Thorsten Börnsen is de niege
Baas
Dat geiht wieder mit dat
Plattdüütschzentrum in Holsteen
(pn)
Nu is dat amtlich: Dat Plattdüütschzentrum in Holsteen hett en niegen Baas. An’n
4. Januar is he al in sien Amt
inföhrt worrn. Thorsten Börnsen hett dat Leit för dat „Zentrum für Niederdeutsch
im Landesteil Holstein“ ( = Plattdüütschzentrum in Holsteen) vun Volker Holm
övernahmen. Un nu is em ok allens övergeven worrn - meist allens.
Thorsten
Börnsen is in de plattdüütsche Welt keen Unbekannten: He wiest de Lüüd dat
Hamborger Rathuus, föhrt jüm dörch de Hamborger Altstadt un hett dorför ok en
Book, en Stadtföhrer op Platt rutbröcht. Bi den plattdüütschen Musikwettbewarb
för junge Lüüd, den Plattsounds-Wettstriet, hett he düchtig bi de
Organisatschoon mitmaakt. Utwussen Lüüd hett he Plattdüütsch bibröcht bi de VHS.
Un in de letzten Jahren weer he düchtig togangen bi dat Ev. Bildungszentrum
Hermannsburg in Neddersassen mit egen Projekten.
Nu schall he Plattdüütsch in Sleswig-Holsteen vöranbringen. En Barg Arbeid luurt op em: Dat Land hett jüst den Handlungsplan Sprakenpolitik beslaten. Dor gifft’t bannig wat to doon: 29 Scholen in’t Land sünd nu Modellscholen un as dull an’t Plattdüütschleern. De schöllt Hölp kregen. Un ok bi de ganz Lütten in de KITAs un KIGAs lett sik noch wat in Gangen setten. Ok de Ollen un Kranken töövt al: Plattdüütsch in de Pleeg is heel wichtig. Un ok plattdüütsche Kulturpleeg is en Thema. - Gifft't veel to doon!
Toeerst
aver mutt sik de niege Baas vun’t Plattdüütschzentrum inrichten: Sien niege
Arbeitsplatz schall de Stadthauptmannshoff in Mölln ween - un dor ward nu
düchtig ümbuut. Dat duert sachs en Stoot!
Wi
wünscht Thorsten Börnsen allens Gode för siene niegen Opgaven!
(PLATTNET-Nachricht)
Besöök ok http://www.facebook.com/PLATTNET.de un wies uns, dat di PLATTNET.de behagen deit!
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de Nachrichten-Archiv: alle Nachrichten unter http://archiv.plattnet.de/
Wer in Zukunft keine E-Mail-Informationen von
PLATTNET haben möchte, den bitten wir, uns das in einer kurzen Nachricht
mitzuteilen: nieges@plattnet.de