PLATTNET-Nachricht  -  02.03.2016

Johann-Friedrich-Dirks-Pries van de Stadt Emden

Utschrieven 2016 / 17

„Daar buten in de wiede Welt“ – dat is dat Motto van den Johann-Friedrich-Dirks-Pries 2016/17, för den nu wedder en Utschrieven rutgeven worrn is.

De Pries is dacht för Schrieverslüüd. Tolaten is Literatur van all Förmen. Bi Prosa sullen dat tominnst 5 Sieden wesen, un neet mehr as 16 (DIN A 4, Schrift 12 p un annerthalv Riegen Ofstand). Bi Lyrik 5 Gedichten. En Höörspill of en Theatertext sall kört beschreven worden, daarto en Proovstück van 5-10 Sieden.

Daar sallen blot plattdüütse Texten komen, de noch nargends to hören of to lesen wassen, un keen Oversettens. Annomen worden ok Texten in ’n anner Platt as dat Oostfreeske, ok ut Münsterland, Oostfalen, Drenthe of Groningen (daar kunn aver ’n hoogdüütse Oversetten wall helpen).

De Johann-Friedrich-Dirks-Pries umfaat ’n Geldpries van 2500 € plus en Statuette. Wiederhen kann dat ok noch ’n Anerkennungs- of Föderpreis van 500,- € för en anner instüürt Wark geven.

För Kinner un jung Lüü bit ruugweg 20 Jahr gifft dat ’n egen Weddstried, waarbi Ollen, Grootollen, Mesters, Nabers helpen könen. De Pries van 1000 € stift de Spaarkasse Emden.

De Texten mutten bit to d’ 31. Oktober 2016 bi ’t Kulturbüro van de Stadt Emden wesen!

In de Januar 2017 word bekannt geven, well de Priesen kriegen sall, un de grote Priesfier sall wesen an d’ 9. Februar, Johann Friedrich Dirks sien Gebuursdag, in de Rummel van ’t Emder Raadhuus.

Mehr to weten gifft’t in’t Utschrieven in’n PDF-Anhang.