PLATTNET-Nachricht  -  16.03.2016

Plattdüütschwelt in de Stadt Celle 2015 - 2016

Celle hett wedder ´n Beopdrogde för de Plattdüütsche Sprook: Elisabeth Thies ut Lütjen Hehlen. Se fulgt Jürgen Heitmann ut Olencelle no, de vun 2005 bet 2014 dorvör bestallt weer.

Elisabeth Thies is dör un dör ´n Plattdüütsche un den Fachdeenst Kultuur in´t Raathuus dör mannigfache Veranstalten in de ehemolige Begegnungssteed al veelveel Johren bekannt. Alleen op ehr Initiativ hen is de Lütjen-Hehlener-Plattdüütsch-Theatergrupp  nu al 30 Johr lang in Celle estemeert.

Neven de Celler Stadtverwalten, Fachdeenst Kultuur, is de Lümborg´sche Landschopsverband as hülpriek Anlooppartner för Elisabeth Thies de grode Stütt üm dat Plattdüütsche in de Celler Regioon.

Elisabeth Thies hett mit ehr Idee to´n Johrsanfang 2016  dat Drepen „Platt no Fierobend“ ingang sett´t:  Niederdeutsch Sprechende treffen sich zum „Stammtisch After Work“ einmal im Monat im Kulturbistro „Kunst & Bühne“.

All´ un jedwede Plattsnackers sünd willkomen, dor is nix verkehrt – so dat Motto.

An den eersten Obend harrn sik allerlei Lüüd ut de verschedenst Kuntreien rundüm vun Celle infunnen, ofschoonst de Unbillen butendöörs mit Ies un Snee dat Henkomen meist nich toloten harrn. Vertreder ut ünnerscheedlichst Ecken weern mit Heug un Meug an´t Kennenlieren, lustig Diskereren mit degden Spooß dorbi.

So weern neven E. Thies un J. Heitmann de Vörsittersch vun de Plattdütsche Gill Celle, Ilse Hemme, ut de Lokolpolitik Annegret Pfützner, as Senior de överregionool bekannte Platt-Töverkeerl Hermann Timme, vun´n Fachdeenst Kultuur Ina Henning un ümbi teihn anner Lüüd komen. Twee Froonslüüd harrn ehr Komen dormit begründ´t, geern mool bi dat Plattdüütsche rintoluustern. Een besünner Bott harr de Plattbeopdrogde bobento noch proot: Keen sik vöran dat maandlich Drepen geern ´n beten in´t Plattdüütsche rinhüürn mag, is ´n halve Stünn ehrder to sückse Kuntakten vun Harten willkomen.

Ansüss gellt för Celle: De „Platt no Fierobend“-Stammdisch jeden eersten Dingsdag in´n Maand Klock halvig söss in Kunst & Bühne, Celle, Nordwall 46.

Schons in´t Freujohr 2016 ward to´n Plattdüütsch-Week in Celle inlod´t:

05.04.2016 Klock halvig söss, nomeddags: „Kunst & Bühne“, Platt no Fi´erobend

06.04.2016 Klock halvig dree, nomeddags: „Heidekönig“ Bremer Weg, Plattdütsche Gill

08.04.2016 Klock acht, obends: „Kunst & Bühne“: Gitta Franken-Dreeblatt  „Dusend Fragen“ / Plattdüütsch´ Lesungen ut „Wunnerwark“

09.04.2016 Klock teihn, vörmeddags, bet Klock fiev: Olencelle, Warkeldag mit un üm den Schrieverkring Weser-Ems

(Elisabeth Thies - Stadt Celle Fachdienst Kultur - Lüneburgischer Landschaftsverband)