PLATTNET-Nachricht  -  03.04.2016

Airbus op Platt

Mit den Vereen „Plattdüütsch in Hamborg“ na’t Fleger-Wark

(pn) An’n 22. April 2016, Klock veer nameddachs, organiseert „Plattdüütsch in Hamborg e.V.“ en Föhrung dörch dat Airbuswark op Finkwarder in Hamborg. Bi düssen Törn op Platt gifft dat veel to kieken bi dat Monteern vun de groten Flegers. Seker warrn de Lüüd dor ok de ganz groten Maschinen to sehen kriegen: Den A320er, den A380er un den Airbus-Lastesel Beluga. Keen dorbi ween mag, de kann sik anmellen ünner de Mailadress charter@hf.231de or telefonisch ünner 040 30891584. Dor kann een ok mehr Informatschoon kriegen. (Wo lang dat duert, woneem de Lüüd sik drepen doot, wat een den Utwies mitbringen mutt, wat dor veel lopen warrn mutt usw.) Op jeden Fall is dat nix för Kinner: De Deelnehmers mööt öller as 14 Johr ween. De Tour gellt/köst 23,00 Euro, de an de Veranstaltungsfirma betohlt warrn mutt. Gau anmellen!

(Uwe Hansen, Plattdüütsch in Hamborg e.V. - www.plattdeutschinhamburg.de)

(De Veranstalten is Deel vun den „1. Hamborger Plattdüütsch Dag“)