PLATTNET-Nachricht  -  07.04.2016

www.platt.hamburg

En niege Adress för Plattdüütsch in Hamborg!

(pn) Plattdüütsch in Hamborg hett en niege Adress. In’t Internet licht to finnen ünner www.platt.hamburg. Dat is nu de Nett-Optritt vun den Plattdüütschroot för Hamborg. Un de schall Plattdüütsch in Hamborg vöranbringen. Deit he ok. To’n Bispill mit den „Hamborger Plattdüütsch Dag“ an’n 23. April 2016. Un mit allerhand anner Aktivitäten in de Stadt, de de Baas is in de Metropolregion – ok op Platt.

Üm un bi 100.000 Minschen in Hamborg köönt Plattdüütsch. Üm de ehr Anliggen kümmert sik siet 2003 de Plattdüütschroot för Hamborg. He passt dorför op, dat de Regionolsprook Plattdüütsch in de Free’e un Hansestadt Hamborg to ehr Recht kümmt. In den Plattdüütschroot för Hamborg sitt Lüüd, de vun de Hamborger Bürgerverenen, vun de Frakschonen in de Börgerschop, vun de Komern, vun ‘n Rundfunk, vunde Verwaltung un vun’t Ohnsorg-Theoter bestimmt worrn sünd.

Platt is de Sprook, de ok in Hamborg to Huus is. Un so schall dat blieben. Un dorför, dat dat bargop geiht mit Platt, dorför mööt all Verenen, Organisatschonen un Institutschonen Hand in Hand arbeiten. De Plattdüütschroot för Hamborg steiht se dorbi to Siet. Un he hett dor ‘n scharp Oog op, dat dor ok wat bi rutkümmt. Afmaakt!

(Plattdüütschroot in Hamborg - www.platt.hamburg)