PLATTNET-Nachricht  -  10.06.2016

Sprakencharta-Bericht in’n Landdag vun Sleswig-Holsteen

Dat Land sett op en egen Sprakenpolitik för de Regional- un Minnerheitenspraken

KIEL. De verscheden Spraken in Sleswig-Holsteen hebbt in de verleden Johren en goden Stand kregen, dat is düütlich to marken. Dat hett Ministerpräsident Torsten Albig düsse Week in’n Landdag in Kiel klormaakt. He stell den Bericht vun de Landesregeren to dat Ümsetten vun de Europäisch Charta vun de Regional- oder Minnerheitenspraken in Sleswig-Holsteen vör. Dat schall noch wiedergahn, üm Sleswig-Holsteens Spraken stark to maken.

„Wi maakt dat, wat de Europäisch Sprakencharta uns vörgifft, un wi stütt de Sprekergruppen un de autochthonen Minnerheiten, wat se ehr Kultur un ehr Spraken holen köönt“, see Albig. Veel vun dat, wat de Charta seggt un wat de Sprekergruppen bruukt, weer in düsse Periood ümsett worrn. So güng dat mit den Ünnerricht vun Nedderdüütsch un Freesch in de Scholen in Gang – un de Regional- un Minnerheitenspraken harrn nu ok en Stand in’t Billensgesett vun de Lehrers un Lehrerinnen. Bi dat „Institut für Qualitätsssicherung“ an Scholen wörr en Steed för de Spraken in de Scholen ansiedelt. An de Europa-Universität Flensborg wörr över Minnerheiten un ehr Pädagogik forscht, un de Perfesser hett ok Freesch mit op den Plaan. Un denn schall dat ok för de Lütten in’n Kinnergoorn mehr Schangsen geven, ganz fröh al verscheden Spraken mit op den Weg in’t Leven to kriegen – so steiht dat in’t Gesett för de Kinnergoorns.

„Sleswig-Holsteens Minnerheiten-Politik warrt in dat hele Europa goot ankeken. Wi maakt de Minnerheiten- un Sprakenpolitik mit de Lüüd tosamen un nich gegen ehr“, see Albig. Wat dat veel verscheden Spraken geev un wat vele Minschen mehr as een Spraak könen, dat weer en Grundsteen dorför, dat Sleswig-Holsteen riek weer mit düsse besünner Kultur. Un dat teken dat Land ok internatschoonal ut.

De Europäisch Charta vun de Regional- oder Minnerheitenspraken is in Düütschland siet den 1. Januar 1999 insett. Blots 33 vun 47 Staaten vun den Europaraat hebbt bet nu de Sprakencharta ünnerschreven, Düütschland höört mit dorto.

De Sprakenchartabericht steiht ok in‘t Internet: schleswig-holstein.de/minderheiten

(Landesregierung Schleswig-Holstein / Staatskanzlei – Presseinformation in Deutsch, Dänisch, Friesisch, Niederdeutsch)

Besöök ok http://www.facebook.com/PLATTNET.de un wies uns, dat di PLATTNET.de behagen deit! 

_____________________________________________________________________________________________________________________________

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de bei Facebook: http://www.facebook.com/PLATTNET.de

PLATTNET.de Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de