PLATTNET-Nachricht - 06.07.2016
„Eckernföör deit Lief un Seel goot“
Oostseebad warvt för sik mit plattdüütsche Inhalte op de Internetsiet
(pn) De Stadtgeschicht, Porträts över Börgers, op de de Stadt stolt ween kann, un en Barg anner Themen gifft dat siet den 1. Juli op de Internetsiet vun Eckernföör nu ok op Plattdüütsch to lesen. Karl-Heinz Groth, Autor, ehemalige Schoolleiter un Plattdüütsch-Gill-Vörsitter, hett de Texten översett un to Verfögung stellt.
Mit en lütten Button lett sik de Ansicht ümschalten twüschen Hochdüütsch un Plattdüütsch.
Dat sünd mehrstendeels Informatschonen, de länger Bestand hebbt un nich glieks wedder ännert warrn mööt, dormit se aktuell blieben doot. Man ok en Thema as dat „Leitbild vun de Stadt“ is dorbi – woans schall Eckernföör wiederentwickelt warrn? So süht dat op Platt ut:
* De Stadtplanen sorgt dorför, dat Eckernföör as Seestadt eenmolig blifft.
* Eckernföör schütt un verbetert Natur un Umwelt.
* Eckernföör freut sik op sien Gäst.
* Kultur as in Eckernföör gifft dat annerwegens so nich.
* Eckernföör deit Lief un Seel goot.
* Eckernföör is fründlich, lebennig, treckt de Minschen an. Dat lohnt sik un maakt Spoß, hier to arbeiten.
* Eckernföör – dor kann een to jede Dag- un Nachttiet henkamen.
Un denn gifft dat en egen Plattdüütsch-Rubrik för den Internetoptritt. Dor stellt sik de verscheden Intitutschonen un Verene vör mit all de velen plattdüütschen Aktivitäten in de Stadt. Keen Lust dorto hett, de mag gern an düsse Rubrik mitwarkeln.
Ach ja: Nadem dat in’t Fröhjohr Striet geben harr, wat de plattdüütsche Naam vun de Stadt mit een oder twee „ö“ schreben warrn mutt, is’t nu klor: „Eckernföör“ blifft „Eckernföör“!
Besöök ok http://www.facebook.com/PLATTNET.de un wies uns, dat di PLATTNET.de behagen deit!
_____________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de bei Facebook: http://www.facebook.com/PLATTNET.de
PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de
Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.
Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de