PLATTNET-Nachricht - 07.02.2017
Truer üm Hayo Schütte …
(pn) De Schrieversmann Hayo Schütte is an’n Sünndag, den 5. Februar storven. Vun en Krankheit harr he sik jüst verhaalt, dor hett em doch noch de Dood tofaten kregen.
To Welt kamen is he an’n 28. August 1930 in Oostfreesland, man denn hett em de Tiet dörch de Welt spöölt, na Holsteen un na anner Steden op de Noordhalvkugel. Toletzt hett he, de ehemalige Schoolmester, in sien Huus achtern Elvdiek in’t Wendland leevt. Dat weer wied weg vun allens, man jümmers in’n Sommer – denn sünd vele Frünnen bi em in’n Goorn tosamen kamen un hebbt Geburtsdag fiert.
In siene Texten hett Hayo vun siene Beleevnisse vertellt un vun dat, wat em dörch den Kopp güng. Un dat weer mennigmal allerhand snaakschen Kraam: Alldagssaken un Gedanken vun Gott un de Welt. Un so hett he en Reeg vun wunnerbore Böker schreben: „As ik noch wat jünger weer ...“, „Dree Kinner un een Peerd“, „Hest du al mal in en Vagelnest seten?“ un „Pérdita“. He weer een vun de Vergnögten, een vun de Nadenkern, een vun de Achtersinnigen. Man he weer een, den all gern harrn.
Hayo harr dat nich licht, de Folgen vun siene Polio-Krankheit hebbt em to schaffen maakt. Man he leet sik dat nich nehmen, sik dorhen fohren to laten, woneem de plattdüütschen Schrieverslüüd sik drapen doot, to’n Bispill na Bämsen in’n Harvst (Bad Bevensen) un na Mölln in’n Maimaand. Man de Lüüd üm em rüm weern jümmers för em dor. En wunnerbor Familie: Söhn Riklef hett em fohren, he hett em de Treppen op un dal holpen. Dochter Rika hett sik üm siene Internetsieden kümmert. För ehr un för ehre Musikgrupp „Swing op de Deel“ hett he de passlichen plattdüütschen Texten schreben. Tosamen hebbt se feine Optritte hatt.
Dat geiht nu allens nich mehr – wi sünd bannig trurig.
Achter’t Kap
Achter’t Kap Afgrund
Man hoou! Wat mooi is dat hier
Bleuht noch de Blömen
Kiek jem an un rüük
Kunn sien dat s’ di bold afhålt
Sinnig Fööt vörut
Letzten Wien in’t Glas
Någeten doot s’ di nich mehr
Drink dat mit Verstand
Hayo Schütte
_____________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de bei Facebook: http://www.facebook.com/PLATTNET.de
PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de
Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.
Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de