PLATTNET-Nachricht  -  25.02.2017

Vör hunnertföftig Johr: Rudolf Tarnow

An´n 25. Februar 1817 is in Parchim Rudolf Tarnow op de Welt kamen. Na Fritz Reuter gellt he as een vun de bekanntsten Meckelbörger Dichter. Sünnerlich siene „Burrkäwer“-Böker warrn jümmers noch geern leest – tomehrst humorvulle Dööntjes ut dat Meckelbörger Volksleven. Un ok sien Riemelwark över „Köster Klickermann“, dat 1921 rutkeem, slöög in bi de Lüüd. Hier nehm he School un Kark op´t Korn.

Mehr över den Dichtersmann Rudolf Tarnow (1817-1933): https://de.wikipedia.org/wiki/Rudolf_Tarnow

De schew Globus

Nu wier vergahn all männig Johr,

Un ok ein Globus wier all dor,

Un Klickermann wier forsch dorbi

Mit Weltgeschicht un Gegrafi,

Un fragen künn he, krüz un quier,

De Görn, de wüßten noch väl mihr.

Hüt oewer hett oll Klickermann

Den swarten Herrgottsdischrock an

Un sitt so mastig up den Stauhl,

Un musingstill is rings de Schaul,

Denn wedder giwt he Gegrafi, -

Un de Herr Schaulrat sitt dorbi.

Herr Schaulrat oewer is taufräden,

De Görn, de wüßten, wat se säden.

»Ja«, seggt he, »lieber Klickermann,

Was ich als Schulrat fordern kann

Auf dem Gebiet der Geographie,

Ich bin erfreut, das wußten sie,

Die Kinder waren gut beschlagen;

Nun möcht’ ich selbst noch etwas fragen,

Nur eine Frage soll es sein,

Es fiel mir nebenbei so ein.«

Un ward nu nah 't Katheder gahn,

Dor würd dat Dings von Globus stahn,

Up dissen Globus wiest he hen.

»Nun sagt mal, Jungs, wie kommt es denn,

Daß hier die Kugel, wie Ihr seht,

Ganz schief nach einer Seite steht?

Steht denn der Globus immer so?

Wie kommt es wohl, Karl Beggerow?«

Wat? denkt nu Korl, schew sall he stahn?

Na, Gott sei Dank, ick hew 't nich dahn!

Dat Best is woll, hier swiggt 'n still,

Man kann nich weiten, wat he will,

Dit kümmt mitünner ganz verdreiht,

Un seggt nu nix un kickt un steiht.

»Nun?« ward de Schaulrat wieder fragen,

»Wer von Euch Andern kann es sagen?

st es denn keinem von Euch allen

Beim Unterricht mal aufgefallen,

wenn Ihr die Kugel habt gedreht,

Daß sie ganz schief und schräge steht?«

Doch keiner wüßt, un jedermann

Keek schulsch den ollen Globus an,

Se würden nu ierst ahnig ward'n,

Dat se 'nen schewen Globus harrn.

»Herr Schulrat«, seggt nu Klickermann,

»Wenn ich mal unterbrechen kann,

Die Schiefigkeit ist ihr nicht klar;

Ich hab ihn schon so viele Jahr,

Doch kam er nicht bei mir zunichte,

Er war schon schief, als ich ihn kriegte.«

                             (Rudolf Tarnow)

Besöök ok http://www.facebook.com/PLATTNET.de un wies uns, dat di PLATTNET.de behagen deit! 

_____________________________________________________________________________________________________________________________

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de bei Facebook: http://www.facebook.com/PLATTNET.de

PLATTNET.de Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de