PLATTNET-Nachricht – 03.07.2017

PLATTNET-Bökertipp

„Löppt?!“ – de Vertell-doch-mal-Anthologie

(pn) Sössuntwintig Schrieverslüüd hebbt dat schafft: Se sünd binnen in dat niege Book mit Geschichten vun den Wettbewarb „Vertell doch mal!“, den de Norddüütsche Rundfunk tosamen mit Radio Bremen, dat Ohnsorg-Theater un de PNE Wind AG ok dütt Johr wedder op de Been stellt hett.

Op 116 Sieden kann een de Texten nalesen – allerbest Lektüre för de Sommerdaag! Dat sünd as in de verleden Johren Geschichten to’n Smustern, to’n Högen un to’n Besinnen. Mennig een vun de Schrieverslüüd in dütt Book hett to’n ersten Mol en Text inschickt hatt un is glieks mit dorbi. Dat is beachtenswert bi mehr as 1300 Insendungen.

Fiefuntwintig Geschichten sünd vun utwussen Lüüd, de sössuntwintigste hett Leonie Brandt schreben, en Deern vun 13 Johren, de in Meldörp to School geiht. Ehr wunnerbore Vertellen hannelt vun en fiensinnig Grootvadererinnern.

Natürlich sünd ok all de Geschichten in dat Book, de bi de Afslussgala an’n 11. Juni in’t Ohnsorgtheater sünnerlich uttekend worrn sünd, also ok de Vertellen „Wat Helmut noch wüss: Ik was de fiefde Beatle!“ vun Achim Goldenstein ut Papenborg. Düsse phantasievulle Geschicht hett vun de Jury den ersten Pries kregen.

Achter jedeen Text steiht en lütt Stremel, de Utkunft geben deit över denjenigen, de de Geschicht schreben hett. So kann een sik glieks en Bild vun em maken.

NDR (Hg.): Vertell doch mal

Löppt?!

26 plattdeutsche Geschichten

Wachholtz Verlag, Kiel 2017

ISBN 978-3-529-04931-6

12 Euro

Besöök ok http://www.facebook.com/PLATTNET.de un wies uns, dat di PLATTNET.de behagen deit! 

_____________________________________________________________________________________________________________________________

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de bei Facebook: http://www.facebook.com/PLATTNET.de

PLATTNET.de Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de