PLATTNET-Nachricht – 29.10.2017
PLATTNET-Bökertipp – Plattdüütsch Bökerharvst
Werner Momsen: Dag ok ...
(pn) Alldagsgeschichten – dor is dat Bökerschapp vull von. All Nääslang vertellt en Plattsnacker vun dööntjehafte Beleevnisse, vun hüüt un güstern, vun em un ehr. Man nu kümmt Werner Momsen. De Klappmuulpopp. Süh, un dat is denn doch en beten wat anneres. Klor doch, ok Werner vertellt vun den alldäglichen Kladderadatsch to’n Bispill mit de Telekom, wenn dat mit den Telefon- un Internetansluss nich hinhauen deit. Aver Werner is jo egentli bloots en Kunstfigur, also wenn du so willst – nüms. Sien Achtermann is de Baas, sien Poppenspeler. Un dormit is de ok de Autor vun dat, wat Werner seggen deit. Dat is Detlef Wutschik, de Werner vör meist 20 Johren to Welt bröcht hett. Man so kriggt de Perspektive bi’t Vertellen ok glieks en ganz anner Schick: Werner hett dat Privileg to en kommodige Distanz to de Themen, de de Autor sik vörnahmen hett. Bispill: Neemoodsche Kaffemaschien. „Ik bün jo stets gewillt to verstohn, wat de Minschen so allen moken doot. Aver wat de siet eenige Tiet förn Hallas mit ehrn Kaffee mookt, dat mookt mi fardig.“ Oder: „För mi as Popp is dat al swoor to verstahn, worüm de Minschen sik verheiraden doot.“ Un denn geiht‘t los – Werner kann düchtig vun’t Ledder trecken, un dat deit he denn ok. As Popp kann Werner Momsen seggen, wat Minschen nich seggen könnt. He süht de Welt dörch en anner Brill – un de wiest uns oftmals en ganz anner Blick op de Wirklichkeit. Wat dorbi rutsuert, dat is lichte Kost, de nich swor in’n Buuk liggen deit, dat is heel drögen norddüütschen Humor. Klor, wenn Werner alias Detlef Wutschik snacken deit, as wi dat beleven doot in’t Radio oder op de Bühn, denn hett dat noch en ganz anner Schick. Liekers kriggt wi den Tonfall ok bi’t Lesen in’t Ohr. – Harr doch bloots een de Manuskripten vör’t Drucken nochmal nipp un nau dörchkeken, wat Orthografie un Interpunktion angeiht, denn weer de Genuss komplett!
Werner Momsen (Detlef Wutschik):
Dag ok …
Quickborn-Verlag, Hamburg 2017
ISBN 978-3-87651-442-0
7,80 Euro
Besöök ok http://www.facebook.com/PLATTNET.de un wies uns, dat di PLATTNET.de behagen deit!
_____________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de bei Facebook: http://www.facebook.com/PLATTNET.de
PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de
Eine Weitergabe der Adressaten-Daten, vornehmlich für gewerbliche Zwecke, ist ausgeschlossen.
Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de