14.06.2018 - (18077) Bökertipp: "De Leevde" von Rainer Prüß

0-plattnet-logo.gif                                                      PLATTNET-Nachricht – 14.06.2018

 

PLATTNET-Bökertipp

 

DE LEEVDE.jpg

           

Rainer Prüß

De Leevde

De Leevd vun Anfang bit to Enn, ohne dor wat uttoblenn

 

RAINER PRÜSS hett ‘n niet Book maakt:   DE LEEVDE, wedder mal mit Riemels, in Grau, Swatt, Witt un Rot illustreert, un sogor ‘n poor Leder sünd noch dorbi.

Woans heet dat in den Ünnertitel: DE LEEVD VUN ANFANG BIT TO ENN, OHNE DOR WAT UTTOBLENN – Nee, utblennt warrt dor ok nix, denn op de Rüchsiet steit dat je al: VUN LEEVDE, SEX UN ANNER SAKEN, DOR KANN MAN SIK EN RIEMEL MAKEN. Un ‘n Riemel maakt he sik över dat Ganze. Woans man sik neger kümmt, woans dat to Enn geiht un allens, wat dortwischen liggt.

Wat seggt Rainer Prüß, Priesdreger vun den Kappelner Literaturpries 2017:

„Mien Föhlen un Denken speelt in düsse Tiet mit all dat Internet, Home-Office, face- un hetz-book un so wieder. Aver bi dat ganze moderne „Liken“ gifft dat je jümmers noch de Leevde in all ehre Variantens. Mit un ohne Heirat, mit un ohne Kark, mit un ohne Hauerie un Rosen­krieg un all den Quark, mit un ohne Patchwork, bit hen na de sogenannte Polyamorie. Wat mi in de plattdütsche Schrieverie je opfallt, is: Dat gifft en Barg Riemels or Gedichtens över Leevde, richtig schöne Saken, aver meist nix över Sex, un dat höört je doch ok woll dorto, jedenfalls in‘t Föhlen, Denken un Doon. All doot se dat, sonst geev dat je doch keen Gören, un de meisten hebbt je woll ok masse Spaaß, aver as ik segg, in de plattdütsche Literatur gifft dat meist nix. Is Sex to platt för dat Platt? In Hooch gifft dat je genoog un sülvst Goethe hett ‘n Barg Sex-Riemels maakt. Höllt in dat platte Land vun ole Tieden noch jümmers de Kark de Hann över dat Thema un is de Lüüd dat to jeneerlich wegen Sünde un so? Dat heet je ok, wat Spaaß maken deit, is för de protestantische Seel eh al verdächtig.

So kann dat ween, wat de een or anner den een or anner Vers politisch or moralisch ni kor­rekt finnen deit, nu denn – denn is dat so. Keen dat nich gefallt, bruukt dat je ni lesen oder kann dat Book ok wegsmieten or verschenken. Beschwerde hett bi mi jedenfalls keen Zweck. Mien Fruenslüüd hebbt dat allens leest, sik höögt un nix to meckern hatt. Wat mi doch freit, denn keener hett de Wohrheit pacht, aver jedeen hett dat Recht op sien Menen. Ik heff versöcht, vele Aspekte vun de Leevde afftobilden, wat ik sülvens beleevt heff, aver ok dat, wat ik üm mi rum sehn un föhlt heff. Dat allens kann man as Schriever höger or deper leggen, verdünnen oder verdichten, bunte Mischung, ganz na Lust un Laune, man allens na dat Motto: De Leevd vun Anfang bit to Enn, ohne dor wat uttoblenn.“

Un so is dat en Book worrn för’t Lesen, Erinnern, Nadenken un Naföhlen. En Book, dat een mit veel Empathie in sik opnehmen deit – mal mit Grienen, mal mit Besinnen. Un babento en wunnerbor maakt Book in de Hand to nehmen, so as de Böker vun Rainer Prüß nu mal maakt sünd: sporsam in Ilustration un Farv, individuell in’t Layout, konzentreert op den Text: Un de wiest dat Leevs-Leven vun dat Lyrische Ik, un dat is in düssen Fall en Mannskeerl vun de Jugend bit in’t Öller. Denn mag dat ok woll autobiografisch ween. Wat schrifft he in de Widmung? „Für meine Frauen“.

Dat Book gift dat in‘n Bookhannel oder ok direkt bi

RAINER PRÜSS

24939 Flensburg, Norderstr. 20A

Fön: 0461 90 21 9-0

pruess@rainer-pruess.de

www.rainer-pruess.de

DE LEEVDE

ISBN 978-3-00-059444-1

I.Auflage 2018

120 Seiten, Hardcover

Preis 19,80 EURO

pn – Infoquelle: PM RAINER PRÜSS

 

Besöök ok http://www.facebook.com/PLATTNET.de un wies uns, dat di PLATTNET.de behagen deit! 

_____________________________________________________________________________________________________________________________

 

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   ist ein privates nichtkommerzielles Projekt.

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de bei Facebook: http://www.facebook.com/PLATTNET.de

PLATTNET.de Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.