27.09.2018 - (18107) Bökertipp: "Laat di Tiet is ok en Walzer" (Anthologie)

0-plattnet-logo.gif                             PLATTNET-Nachricht – 27.09.2018

 

            cover.jpg

 

PLATTNET-Bökertipp

 

Laat di Tiet is ok en Walzer

Plattdeutsche Geschichten

 

(vh/pn) Kiek, denkt he, al wedder so’n Book för den gau verdeenten Euro. Recht wat dünn, dormit dat Lesen nich to Last fallt. De faste Inband meist dicker as de Bookblock mit de knapp 80 Sieden, so kann’t tominnst nich wegweihn an’n Strand! Un denn poppig gröön, mit Biller vun danzende Trachtenlüüd, en ool Buernhuus un – wat Wunner! – en witt-roden Lüchttorn, üm den de Möwen seilt. Wat en Kitsch! So en Book liggt denn ganz vörn bi de Regionalia in den Touri-Shop. „Das nehmen wir Oma mit, gelt? Die mag doch so gern Plattdeutsch!“

Oma ward dat bisiet leggen un nienich rinkieken…

Wat dat woll för en Schriever ween mag, de al wedder de Welt mit en Dööntje-Book beglücken deit?

Man Stopp! Wat is dat? Heel renommeerte Namens staht ganz lütt op de Titelsiet: Karl-Heinz Groth, Heinke Hannig, Marianne Ehlers un Heiko Gauert. Dööntjes-Literatur? Vun „em“ un „ehr“, vun Familie, man jümmers humorvoll un af un an skurril un nadenkern, schrifft de Verlag – naja.

Un denn nimmt he sik den Text to Bost, een na’n annern. De Schrieverslüüd kennt he, hett al veel vun se leest. Bi jedeen Geschicht steiht de Naam an’t Enn. So is dat en Vergögen, sik an’n Anfang to överleggen, keen se schreven hett. Un dat passt: Se hebbt ehre speziellen Egenarten, de veer. Bi Heiko Gauert markst den Schoolmester, bi Marianne Ehlers de Deepsinnigkeit, bi Heinke Hannig dat Skurrile un bi Karl-Heinz Groth de lange Erfohrung mit verscheden Vertellwiesen. Af un an markt he, den een un annern Text hett he jichens irgendwo al mal leest oder hört. Aver: Se passt goot tohopen, de veer.

Un wat steiht denn nu in dat Book mit de 24 Geschichten? Naja, as dat al seggt worrn is: veel vun düt un dat, aver jümmers humorvoll un af un an skurril un nadenkern. Een vun de schönsten Vertellen is de vun „Oma“. Keen de schreven hett? Segg ik nich. Kiek doch sülvst na! Veel to schaad, dat een dat nich lesen dee un bloots Omas dat schenkt kregen, de dat bisiet leggen doot!

Karl-Heinz Groth, Heinke Hannig, Marianne Ehlers und Heiko Gauert:

Laat di Tiet is ok en Walzer.

Plattdeutsche Geschichten

Wartberg Verlag, Gudensberg 2018

ISBN 978-3-8313-2884-0

12,00 Euro

 

Besöök ok http://www.facebook.com/PLATTNET.de un wies uns, dat di PLATTNET.de behagen deit! 

_____________________________________________________________________________________________________________________________

 

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   ist ein privates nichtkommerzielles Projekt.

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de bei Facebook: http://www.facebook.com/PLATTNET.de

PLATTNET.de Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.