PLATTNET-Nachricht – 04.04.2019
En ne‘e Beopdragte för Plattdüütsch
Rike Henties is nu för den Landkreis Horborg tostännig
Dat Plattdüütsche in den Landkreis Harborg hett vun‘n April an en hauptamtliche Steed: Rike Henties is de ne‘e Plattdüütsch-Koordinatorin in‘n Kreis. De 31-Johrige ut Arvstörp (Landkreis Lümborg), de Platt as Mudderspraak snackt, kümmert sik nu in Deeltied üm dat Nedderdüütsche. Organisatorisch is de Steed an‘t Freilichtmuseum am Kiekeberg anbunnen.
För Rike Henties is Nedderdüütsch de sprickwöörliche Mudderspraak: „Miene Mudder un miene Oma hebbt mit uns dree Kinner ümmer platt snackt.“ Na ehr Utbilden to Maatsniederin un Modedesignerin is se Schoolassistentin worrn. Ut ehr Arbeit kennt se den Landkreis Horborg goot un is ok mit vele Scholen vernett. Bet in de 1990er Johr hett se Vöroordele gegen Plattsnacker beleevt. Disse will se nu ok op professionelle Ebene entkräften: „Ik will mi mit veele Lüüd ut de Szene tohoopdoon - dor ut entstaht meist de besten Ideen. Un ik will wiesen: De Spraak is för all tohoop attraktiv - för jedet Öller un ok för Minschen, de se to Tied noch nich oder nich fleten snacken doot.“
Rike Henties warrt veel in‘n Landkreis ünnerwegens sien. „Dat is wichtig, dat een sik sehen lött“, seggt se. As Koordinatorin is se Nachfolgersche vun Herbert Timm, de vele Johren as ehrenamtlichen Beopdragten warkt un bannig engageert veel op den Weg bröcht hett.
Twee positive Entscheidungen hebbt hulpen de Steed as Plattdüütsch-Koordinatorin in'n Landkreis Horborg intorichten: De Kreisdag hett sik Enn 2018 mit grote Mehrheit fraktionsövergriepend för dat Inrichten vun en hauptamtliche Steed utsproken. Un: De Personalkösten deelt sik de Landkreis mit den Fördervereen vun dat Freilichtmuseum am Kiekeberg. So weer dat sinnvull, ok de Steed vun de Plattdüütsch-Koordinatorin organisatorisch an Kiekebarg antobinnen. De Steed is tonächst op twee Johr anleggt. En Evaluierung warrt denn Entscheidungsgrundlaag för de Kreisdagsmitglieder, de över de Utrichtung na 2020 afstimmen doot.
(nach PM Kiekeberg-Pressestelle – www.kiekeberg-museum.de)
_____________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de ist ein privates nichtkommerzielles Projekt.
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de bei Facebook: http://www.facebook.com/PLATTNET.de
PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de
Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.
Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.