PLATTNET-Nachricht – 25.06.2019
„Dat grote P“ för Frenz Bertram
De Fördervereen vun dat Plattdüütschzentrum in Leck hett Uttecknung an plattdüütschen Schrieversmann utgeven
(pn) De plattdüütsche Autor Frenz Bertram hett „Dat grote P“ kregen. Bi en Fierstünn in Schwabstedt (NF) is de 82 Johr ole Mildstedter mit den Nedderdüütsch-Pries uttekend worrn, den de Fördervereen vun dat Plattdüütschzentrum in Leck för besünnere Aktivitäten in de Region sik hett infallen laten. To Truels Hansen, den Vörsitter vun den Vereen, sä Bertram mit Bewern in de Stimm: „Velen Dank. Dien Lüüd hebbt mi düsse Ehr todacht.“
De Laudatio höll op siene humorvolle Oort Ingwer Oldsen, de vun 2008 bit 2017 dat Leit harr vun dat Plattdüütschzentrum. He sä, dat Frenz Bertram bannig veel för de plattdüütsche Moderspraak doon harr. Siene Texten sünd druckt, opföhrt un in’t Radio sendt worrn.
De studeerte Bauingenieur un Studiendirektor a.D. is 1937 in Schwabstedt to Welt kamen. Siet 1954 hett Bertram plattdüütsches Theater speelt, 1980 kreeg he dat Leit vun de Mildstedter Theatergrupp. Siet 1986 schrifft he plattdüütsche Geschichten, vele Sketche un 14 Eenakter. En Barg Utteknungen hett he al kregen. Ingwer Oldsen: „Man liekers, ick glööv, bi all de Ehrungen blifft dat menschliche Rundum för Frenz dat Wichtigste.“
De 30 Zentimeter hohe Grote-P-Skulptur ward all twee Johr utgeven „för grote Leistungen und Verdeenste för de plattdüütsche Spraak und Kultur“. De Priesdräger kriggt 500 Euro. To den Fördervereen för dat Plattdüütsch-Zentrum höört 132 Gemeenden, fief Städte, fief Ämter, 90 Privatlüüd, elf Vereene, veer Institutionen un twee Banken to.
_____________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de ist ein privates nichtkommerzielles Projekt.
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de bei Facebook: http://www.facebook.com/PLATTNET.de
PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de
Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.
Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.