08.05.2020 - (20056) Vör 75 Johren - dat Lieden is lang noch nich vörbi

0-plattnet-logo.gif                       PLATTNET-Nachricht – 08.05.2020

 

         1945.jpg   Foto: NDR             logo_ndr1niedersachsen.gif

 

Vör 75 Johren – dat Lieden is lang noch nich vörbi

Erinnern an dat Enn vun den Tweten Weltkrieg

 

(pn) An’n 8. Mai 1945 weer de Krieg in Düütschland to Enn. Nee, nich wirklich!

Dor worrn liekers noch Minschen dootschaten, Familien, de ehre Heimat verloren harrn, de weern op de Flucht, un Suldaten wiet verstreut in Europa kemen in Gefangenschop.

 

In vele Familien is de Erinnerung noch waak: Öllere Lüüd besinnt sik, vertellt vun furchtbare Beleevnisse, jüngere Lüüd hebbt mitkregen, woans ehre Öllern un Grootöllern dat Gräsen mitslepen hebbt in de nee Tiet.

 

För NDR 1 Radio Neddersassen hett Hanne Klöver mit Lüüd snackt, de doröver berichten kunnen un wullen. Dorut hett se en indrucksvull Radiosendung maakt, de de Hörers noch lang tofaten hölt.

 

Mit veel Empathie hett de Autorin ehre ostfreeschen Interviewpartners to Wort kamen laten: De ole Fru, de as Kind beleven müss, woans de lütte Süster blangen ehr dootschaten worr, de Mann, de mit Modder, Oma un Geschwister op den Treck vun Osten na Westen ünnerwegens weer, de Dochter, de beleven müss, dat de Vadder, de ut den Krieg na Huus keem, geföhllos un brutal worrn weer un de, de mit ansehn müss, dat de Heimkehrer bloots noch mit Alkohol wiederleven kunn. Se hett sik Geschichten vertellen laten, woans dat de Jöden güng,  de na dat Kriegsenn ehre Peinigers vun vördem wedderdrepen. Se hett mi Lüüd snackt, de dat Erinnern an de Opfer vun Nazitiet un Krieg waakholen doot, aver ok Täters bi’n Namen nömt.

 

Hanne Klöver hett al vele Johren inföhlsam Interviews maakt un Material sammelt, föhlt sik sülvst bedrapen vun dat Thema. De een un annere vun de Tiettügen is al nich mehr ünner uns; dat gifft jümmers weniger Minschen, de de Tiet sülvst noch beleevt hebbt.

 

En knappe Stünn, in de de Hörer fesselt is vun dat, wat dor na sien Seel griepen deit. Goot utsöcht: Zorte sinnige Musik twüschendörch, vun verscheden ostfreesche Interpreten.

 

75 Jahre Frieden - vom Umgang mit der Erinnerung, Zeitzeugen berichten

NDR 1 Niedersachsen - Plattdeutsch - 27.04.2020 - Autor/in: Hanne Klöver

Podcast-Download: https://mediandr-a.akamaihd.net/download/podcasts/podcast3042/AU-20200423-1646-2600.mp3

 

Bi NDR 1 Neddersassen gifft dat – in’n Wessel mit dat nedderdüütsche Hörspeel – jümmers an’n Maandag en ganze Stünn Plattdüütsch mit en heel besünner Thema, achteran jümmers noch as Podcast natohören.

 

(Volker Holm)

_____________________________________________________________________________________________________________________________

 

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   ist ein privates nichtkommerzielles Projekt.

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de   bei Facebook: http://www.facebook.com/PLATTNET.de

PLATTNET.de   Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.