PLATTNET-Nachricht – 29.06.2020

Jubiläumsutgaw „Plattdütsch Blaumen“

30 Johr „Bund Niederdeutscher Autoren“ e.V.

(PM) Tau dat Jubiläum, „30 Johr Bund Niederdeutscher Autoren“ e.V. för Mäkelborg-Vörpommern un dei Uckermark (an’n 22. Februor 1990 gründ)), harr sick dei Vörstand von’n BNA wat Besonners utklamüstert: All Schriewerslüd, dei as Vereinsmitglieder för dei BNA-Anthologie, „Plattdütsch Blaumen“, Bäuker I (1991) bet XIII (2018), Riemels orer Vertellers schräwen hebben, süll’n in’t Jubiläumsbauk noch eins tau Wurt kamen.

Üm von dei Idee tau ein druckriep Ergäwnis tau kamen, hebben vier „Olle BNA-Haasen“, Edeltraut Richter (Trittelwitz), Heidelinde Wulff (Rostock), Dieter Lockenvitz (Berlin) un Wolfgang Mahnke (Rostock), maandelang dei drüddteigen Bäuker (2100 Sieden) nipp dörchkäken, un nah väl Afwägerie

von fiefunsoebentig Frugens- un Mannslüd Riemels un Vertellers rutsöcht, dei „charakteristisch“ för denn’ Autor un sien Schriewort sünd. Dei bunte Struz „Plattdütsch Blaumen“, Jubiläumsbauk XIV, dei nu bi dei Baukhöker prat steiht, kem dorbi rut.                         

Dat dei BNA in dit Johr up dörtig Johr grotorrige Vereinsgeschicht trüggkieken un nu dat Jubiläumsbauk up’n Disch leggen kann, liggt an dei flietige Arbeid von sien Mitglieder, oewer ok an dat, wat dei Vörstänn un Vörsitter taustann bröcht hebben. Gerhard Diekelmann (Verchen), BNA-Gründer un BNA-Vörsitter von 1990 bet 2000, hett Bauk I bet V rutgäben, Wolfgang Mahnke (Rostock) von 2000 bet 2012, Bauk VI bet X, Dr. Jürgen Rogge (Perleberg-Lübzow), von 2014 bet 2018, Bauk XI bet XIII un Bernd Lubs (Neubranden-burg), siet 2018 BNA-Vörsitter, hett nu sien Gesellenstück, dat Jubiläumsbauk XIV, vörleggt.

Dei „30 Johr Bund Niederdeutscher Autoren“ sünd ein Erfolgsgeschicht, wieldat starke, kreative Schriewerslüd dat BNA-Stüerrad ümmer fast in’e Hand harrn un mit ehr niemodsche Literatur dorför sorgt hebben, dat Plattdütsch in uns’ Land ok taukünftig ein wichtig Kulturgaut bliwt!

Mit Stolt, Freud, oewer ok Weihmäudigkeit präsentiert dei BNA sien Jubiläumsbauk XIV, „Plattdütsch Blaumen“! Männigweck von uns’ BNA-Autoren hebben ehr Schriewtüg all för ümmer bisiet leggt. Sei kamen in dit Bauk noch eins tau Wurt, wieldat wi dei Erinnerung an sei wak holl’n will’n. Tau’n Hoegen un Besinn’n is ok dei Jubiläums-Blaumenstruz bunnen worden. Stäken S’ dei Näs eins rin. Ick wünsch  väl Spaß un Freud bi’t Läsen! 

(Wolfgang Mahnke, BNA) 

Jubiläumsausgabe „Plattdütsch Blaumen“,                   

Bauk XIV, 2020, Schibri-Verlag, Milow 60,

17337 Uckerland,

204 Seien, 10.00 €,

ISBN 978-3-86863-206-4

_____________________________________________________________________________________________________________________________

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   ist ein privates nichtkommerzielles Projekt.

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de   bei Facebook: http://www.facebook.com/PLATTNET.de

PLATTNET.de   Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.