PLATTNET-Nachricht – 07.02.2021
Foto: nordbayern.de
Tiet för Plattdüütsch
Dat Plattdüütsche Hörspeel
(pn) Dat Plattdüütsche Hörspeel hett Traditschoon, dat gifft dat al vele, vele Johren.
Un jümmers noch is dat in’t Radio to hören – bi NDR un Radio Bremen:
„In der Reihe Plattdeutsches Hörspiel tauchen sowohl Klassiker aus den NDR Archiven als auch aktuelle Neuproduktionen zeitgenössischer Autoren auf. Die Inhalte reichen von derb-lustig bis kritisch-besinnlich. Alle zwei Wochen.“
Jüst geiht „Selma“ an verscheden Sennenterminen över den Äther, en nieges Hörspeel vun Heinke Hannig. Un de tokamen Stücken sünd: „Hostensaft“ vun Georg Bühren, „Dat Gespensterschipp“ vun Gerhard Bohde un „Blomen för Evi“ vun Manfred Briese.
Alles över de Stücken un de Terminen: https://www.ndr.de/kultur/norddeutsche_sprache/plattdeutsch/Dat-Plattdueuetsche-Hoerspeel,datplattduetschehoerspielindex100.html
Woans weer dat mal mit en spannend plattdüütsch Kriminalstück? Dat gifft dat af den 28.2. op de verscheden Radiowellen:
„Blomen för Evi“ Kriminalhöörspill van Manfred Briese
„Waarum geiht 't in dat Höörspill, dat 45 Menüten düürt? De Bach-Choor föhrt en Kunzeert mit romantisk Choorsatzen up. Mit in dat Programm de Hymne van Mendelssohn-Bartholdy.
In dit Stück gifft dat en wunnerbare Sopran-Solopartie, de van en Profi för Honorar overnomen worden kann.
Man Choren, de wat up sük hollen, setten bi sükse Saken meesttieds een van de egen Lüü in. De Baas van de Bach-Choor hett Fanny de Updrag geven. De hör Fründin Evi missgünnt hör 't. Alltied Fanny, waarum kriggt Evi nooit de Kans to en Solo?
Evi un Fanny sünd van froher her dicke Fründinnen west, bit Fanny en Aptheker freeit hett. Van de Dag of an is de dicke Frünnskupp tüsken de beid versleten.
Evi gifft sük neet tofree. Se besöcht Fanny in hör Ferienhuus bi Wiesmoor und trüggelt hör, up dat Solo to verzichten. Man de schüddkoppt un word van Evi de Kellertrapp andaalstött. Evi brengt de slimm Besehrte in en Klinik na Emden und schuult sük weg, ehr se hör Naam seggen mutt.
Vergeevs wacht de Choor bi 't Insingen up Fanny. De Baas mutt noodgedwungen Evi de Updrag geven, dat Solo to overnehmen.
De Tohörers klappen an 't Enn as de Verrückten mit de Hannen, so good hett hör de Hymne toseggt. Evi word en groot Struuß Blömen in de Arms leggt ("Blomen för Evi"). Anner Maandag is en mooi Foto daarvan in 't Oostfresenbladdje.
De Swester van de Noodfallstation in Emden mellt sük bi de Kripo. Se hett de Kunzeert-Solostin weerkennt.
Nu versöcht de Kripo ruttokriegen, wat sük ofspöölt hett. Daarbi geiht dat enigermaten ruug tokehr.“
(Manfred Briese)
Vele vun de plattdüütschen Hörspelen sünd ok spiekert as Podcast un könnt jedertiets anhört warrn: https://www.ndr.de/wellenord/podcast4201.html
_____________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de ist ein privates nichtkommerzielles Projekt.
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de bei Facebook: http://www.facebook.com/PLATTNET.de
PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de
Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.
Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.