PLATTNET-Nachricht – 17.06.2021
Funklock stoppen! –
Plattdüütsche Acht-Länner-Konferenz maakt niege Nettsiet künnig
(PM) Se schullen sik nich alleen op dat Thema Höörfunk spitzen, „plattdüütsch Feernsehn höört ok dorto“, see de Sleswig-Holsteensche Landdagspräsident Klaus Schlie to Anfang vun de 2. Funklock
stoppen!“-Konferenz un wünsch de Deelnehmers veel Erfolg. „Funklock stoppen!“ is de Kampagne, mit de Organisatschonen ut acht Bunnslänner vun NRW bet Brannenborg en öffentlich-rechtliche
plattdüütsche Medienplattfoorm föddert.
Bi dat Onlinedrepen verleden Dingsdag, 15. Junimaand 2021, geev dat för de üm un bi 40 plattdüütschen Repräsentanten Vördrääg to hören vun de Minnerheidenexpertinnen Bogna Koreng un
Sonja Wolf.
De enkelte Spreker, de Sprekergrupp un de hele Sellschop – düsse dree mööt tohoopfinnen, dormit en Idee würklich warrn kann. So hett de Sozialwetenschoplersch Sonja Wolf vun´t European Council
for Minority Issues in Flensborg den Prozess beschreven, den ok de Plattdüütschen nu vör sik hebbt, siet se opstahn sünd un verlangt, wat in anner europääsche Länner al lang begäng is: Öffentlichrechtliche Radioprogrammen ok för de lütten Spraken. „Empowerment“ nöömt Fru Wolf den Prozess, in den Minnerheiden sik bewusst warrt över dat, wat se bruukt un wat ehr Recht is, för sik to föddern.
En modeern Lütte-Spraken-Programm maakt dat för de Sprekers mööglich, dat se an elkeen Steed in de Welt ehr Spraak hören köönt un verbetert dat Bild, wat de Spraak na buten hen afgifft. Dat see de
Studioleitersch vun´n MDR in Bautzen, Bogna Koreng in ehren Vördrag. Se hett ok dat böversoorbsche Programm serbski rozhlos bi MDR Sachsen opbuut. Man to so en Programm höört,
dat de Sprekergrupp sülvst sik aktiv bedeligt un dat de jungen Lüüd för de Medien begeistert warrt, so Koreng.
Christiane Ehlers vun´t Nedderdüütschsekretariat is een vun de Lüüd achter „Funklock stoppen!“ Se hett gegen Enn vun de Konferenz dat niege Logo präsenteert, wat Ünnerstütters nu anföddern köönt
bi Nedderdüütschsekretariat un Sleswig-Holsteenschen Heimatbund. Opto maak se de niege Nettsiet künnig. Op www.funklockstoppen.de steiht vun nu af an, wat dat mit dat Verlangen na en öffentlichrechtlich plattdüütsch Radio op sik hett un wokeen dat Anliggen ünnerstütten deit.
Kontakt: Jan Graf, SHHB, 0431-98385-15, j.graf@heimatbund.de; Christiane Ehlers,Niederdeutschsekretariat, 0178-4554619, info@niederdeutschsekretariat.de
_____________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de ist ein privates nichtkommerzielles Projekt.
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de bei Facebook: http://www.facebook.com/PLATTNET.de
PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de
Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.
Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.