PLATTNET-Nachricht – 01.03.2022
Cord Denker
De Krieg fritt allns
Ik mutt nich lang begründen, worum mi in düsse Daag dat grote Gedicht vun den Humoristen Carl Budich (1904 - 1982) „DE KRIEG“ vor Ogen steiht. Een Gedicht, dat sik nich riemelt – Krieg riemelt sik eben nich, Krieg is prosaisch: „Wohrt sik, ji Minschen! Kennt ji den Krieg?“ Un denn bruukt Budich gräsige mennigmal mythologisch Biller, um optorütteln: So fangt dat an: Mit Löög, Afgunst, glatte Wöör. Un Gier – wona? Un denn: De Düvel sparrt sien Höllpoort open! De Krieg staakt rut, scheelöögsch, gierfreetsch, veniensch. De Krieg is groot un gräsig, tücksch un blind. Un ji sünd lütt un minn. Ji warrd nich rekent. He hett veel Helpers: Tanks, Kanonen, Flegers. Sien flietigst Knecht, dat is de Knakenkeerl. As vun een groten Ploog, wo mit sien Knakenfuust de Dood den Ploogsteert höllt, so ward ji ünnerplöögt, äs weern ji Schiet. Un wenn ji kloogt un schreet un wingert, dat höört doch nüms. Villicht nich mal de Herrgott. Juun Stimmen sluckt de Wind. – So mennig Stadt – sackt in een poor Stünn to Schutt un Schören. (Mutt ik ju Kassel, Hamborg, Dresden nöhmen?)
De Krieg fritt allns, fritt Hüüs un Minschen, fritt Mannslüüd, Frugens, Kinner un de Ooln. Je mehr he fritt, je hungeriger ward he. Sien Speeltüüch sünd de Bomben, Hüüs un Toorns, Fabriken, Karken, Minschen, Köpp un Knaken. Wenn ji eerst inseht, de Krieg hett de Överhand, denn is to laat! Un beden, flöken, wenen weckt nich Millionen wedder op. Ja, wohrt ju! Wohrt ju! Nüms kann ahnen, wat allens kümmt!
Ach, leve Carl Budich, an düssen eersten Märzdag 2022 ward ok dien Gedicht mit Raketen-Dunner ünnerplöögt jichenswo in dat ukrainisch Land. Wannehr nimmt de Welt Vernunft an?
Dat ganze Gedicht findt sik in een Anthologie „Niederdeutsche Lyrik 1945-1968“, Verlag der Fehrs-Gilde, 1968, S.26f.
Cord Denker, Pastor a.D. - Plattdeutsch-Kolumnist beim Stormarner Tageblatt
(sh:z –Stormarner Tageblatt – 01.03.2022)
_____________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de ist ein privates nichtkommerzielles Projekt.
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de bei Facebook: http://www.facebook.com/PLATTNET.de
PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de
Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.
Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.