PLATTNET-Nachrichten – 30.08.2023
PLATTRADIO: Dat kann losgahn!
De Radiomakers sünd praat för’t Liveprogramm
(pn) An’n Freedag schall dat losgahn: An den 1. Septembermaand is Premiere bi dat niege Radioprogramm PLATTRADIO. Denn geiht dat los live „on air“ bi den OK Sleswig-Holsteen. Mennig en Week al is dat Redakschoonsteam an’t Öven un Probeern. Jan Graf is Redakschoonsbaas, Dörte Riemer Redakteursch un Arne Lentföhr Redakteur. Op de Internetsiet www.plattradio.com stellt se dat Projekt vör:
„PLATTRADIO is en Afdelen vun den Sleswig-Holsteenschen Heimatbund un warrt föddert vun dat Land Sleswig-Holsteen. Uns Kooperatschoonspartners sünd de NDR un de Apen Kanal Sleswig-Holsteen. Opdrag vun de nedderdüütsche Medienplattform PLATTRADIO is dat journalistische Berichten över relevante Schehnissen in Welt un Region - frie un oprichtig.
PLATTRADIO bruukt in schreven un spraken Wöör Plattdüütsch. Blangen de journalistischen Standards, de in frie’e Demokratien gellen doot, arbeit de Redakschoon na hoge Qualitätsstandards, wat de Spraak an sik angeiht. Dorto höört, dat de plattdüütsche Spraak utbuut warrt, woneem dat nödig is. Adressaten sünd Sprekers vun dat Nedderdüütsche un Lüüd, de de Spraak lehrt. PLATTRADIO sennt maandags bet friedags vun Kl. 7.00 bet 8.00 op de Wellen vun den Apen Kanal Sleswig-Holsteen. Achteran staht enkelte Bidrääg op de Siet plattradio.com. PLATTRADIO is to finnen bi Instagram un Facebook un sennt Narichten ok as Podcast bi Deezer, Spotify un anner Anbeders.“
Heel wichtig: “Wi sünd apen för verscheden Kulturen un Spraken.
Wi beschickt uns journalistische Arbeit frie. Se deent nich de Interessen vun jichtenswelk Regerens, Organisatschonen oder enkelte Personen. Wo sik üm Themen streden warrt, laat wi verscheden Sieden to Woort kamen. Ut uns Arbeit treckt wi keen Vördelen för uns sülvst.
Wi pleegt Fründlichkeit, professionellen Anstand un Eernsthaftigkeit.” (Ut dat PLATTRADIO-Leitbild)
Worüm PLATTRADIO?
„PLATTRADIO is en Steed, an de de nedderdüütsche Spraak mit Bedacht un Respekt op ansehn Rebeten as Politik oder Weertschop bruukt warrt. De nödige Spraakutbu helpt dorbi, de Spraak för de Tokumst op Schick to bringen. Platt bemött opstünns en dubbelten Swund: De Sprekers warrt weniger un de Spraak dünnt ut dörch dat Övernehmen vun Formen ut de düütsche Spraak. PLATTRADIO verbetert den Status vun dat Plattdüütsche un levert bewusste Spraakvörbiller. Mit dat Warken gegen den dubbelten Swund deent PLATTRADIO de sleswig-holsteensche Billens- un Kulturpolitik, de sik as Maal sett hett, dat de Spraak an tokamen Generatschonen wiedergeven warrt.“
Allens, wat een weten schull över PLATTRADIO un sien Konzept, dat findt sik ünner www.plattradio.com. Dor gifft dat ok dagdäglich de aktuellen Narichten un Bidrääg to lesen un to’n Anhören un en Radio-Stream mit dat Beste, wat in de letzte Tiet produzeert worrn is.
Bi Social Media, Podcast, Streaming-Plattforms – överall is PLATTRADIO nu to griepen.
Allens Gode, PLATTRADIO!
_____________________________________________________________________________________________________________________________
PLATTNET.de Nachrichten Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de
PLATTNET.de ist ein privates nichtkommerzielles Projekt.
PLATTNET.de Nachrichten-Archiv: alle Nachrichten unter http://archiv.plattnet.de/
PLATTNET.de bei Facebook: http://www.facebook.com/PLATTNET.de
PLATTNET.de Nachrichten können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de
Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.
Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de Daraufhin wird die Adresse unverzüglich aus dem Verteiler entfernt.