PLATTNET-Nachricht – 10.03.2026

                     Heiner E. und Heiner D.

Heiner Dreckmann hett uns för jümmers verlaten!

Nu eerst is künnig worrn, wat uns de bekannte Hamborger Volkssänger Heiner Dreckmann an’n 26. Januarmaand 2026 för jümmers verlaten hett. Heiner Dreckmann is 1939 in Hamborg op’e Welt kamen un hett al heel fröh sien Leevde to de Musik spöört.  Al as Kind begeister he sik för de Leder vun de Hamborger Volkssänger as Richard Germar, Charly Wittong, de Gebröder Wolf un sünnerlich för de 100 plattdüütschen Couplets vun Heinrich (Hein) Köllisch. 1987 wörr Dreckmann Maat vun den Polizeichor Hamborg, in den he vele Johren as Solist optreden is. Ok in dat Hamborger Hafenkunzert vun’n NDR is Heiner Dreckmann jümmers weller to hören west.

To’n 100. Dodesdag vun Hein Köllisch (18.04.2001) hett Heiner Dreckmann tosamen mit Holger Voß, Akkordeon un Erwin Petersen, Rezitation de CD „To Pingst‘n, ach wi scheun!“ mit bekannte Couplets vun Köllisch in dat Studio vun Norbert Noritz (Musik-Antik) in Halstenbek rutbröcht.

As ik as Hein-Köllisch-Sammler an’n 16.4.2011 mien Hein Köllisch-Utstellen in dat Museum zeiTTor in Niestadt in Holsteen dörchföhrt heff, heff ik ok heel goden Kontakt to Heiner Dreckmann kregen. Wi sünd vun dor op af över teihn Johren as Heiner un Heiner bi plattdüütsche Verenen in un üm Hamborg un in ganz Noorddüütschland optreden.

As ik an’n 18.4.2023, den Dag as de Hein-Köllisch-Stuuv in de Bökerie vun de Carl-Toepfer-Stiftung apenmaakt wörr un mien grote Köllisch-Sammeln an de Toepfer-Stiftung duerhaft övergeven wörr, hett natürlich ok Heiner Dreckmann dree Köllisch-Couplets sungen.

Wi denkt vull Dankbarkeit an em un sien Stimm torüch un warrt em en ehren Andenken bewohren.

(Naroop vun Heinrich Evers, Neustadt in Holstein)

_____________________________________________________________________________________________________________________________

PLATTNET.de   Nachrichten  Volker Holm, Buchenweg 35, D-22926 Ahrensburg, Tel. 49-4102-4739108 - http://nachrichten.plattnet.de

PLATTNET.de   ist ein privates nichtkommerzielles Projekt.

PLATTNET.de   Nachrichten-Archiv: alle Nachrichten unter http://archiv.plattnet.de/

PLATTNET.de   bei Facebook: http://www.facebook.com/PLATTNET.de

PLATTNET.de   Nachrichten  können unter folgenden Bedingungen verwendet und weiterverbreitet werden: http://creativecommons.org/licenses/by/2.5/deed.de

Eine Weitergabe von Adressaten-Daten findet nicht statt. Gespeichert ist lediglich die für den Versand notwendige E-Mailadresse.

Wer in Zukunft keine E-Mail-Informationen von PLATTNET haben möchte, den bitten wir, uns das in einer kurzen Nachricht mitzuteilen: nieges@plattnet.de  Daraufhin wird die Adresse unverzüglich aus dem Verteiler entfernt.